ब्रेकिंग

ट्रॅक्टरच्या धडकेत युवकाचा मृत्यू

Wrutuja pandharpure
26 May 2025

पुणे : भरधाव ट्रॅक्टरच्या धडकेत दुचाकीवरील सहप्रवासी युवकाचा मृत्यू झाल्याची घटना नगर रस्त्यावरील खराडी भागात घडली. याप्रकरणी पोलिसांनी ट्रॅक्टर चालकाविरुद्ध गुन्हा दाखल केला आहे.

सिद्धार्थ हुल्लाजी घावटे (वय १९, रा. साडेसतरानळी, हडपसर) असे अपघातात मृत्यू झालेल्या सहप्रवासी युवकाचे नाव आहे. याबाबत त्याचा मित्र सूरज राठोड (वय २७, रा. आव्हाळवाडी, वाघोली, नगर रस्ता) याने विमानतळ पोलिस ठाण्यात फिर्याद दिली आहे. दुचाकीस्वार सूरज आणि त्याचा सहप्रवासी मित्र सिद्धार्थ हे दोघेही नगर रस्त्यावरील खराडी भागातून गुरुवारी (२२ मे) रात्री साडेदहाच्या सुमारास निघाले होते. त्यावेळी खराडी बायपास चौकात दुचाकीला पाठीमागून भरधाव ट्रॅक्टरने धडक दिली. या अपघातात दुचाकीवरील सहप्रवासी सिद्धार्थ गंभीर जखमी झाला. त्याला तातडीने नजीकच्या रुग्णालयात दाखल करण्यात आले. मात्र, उपचारादरम्यान त्याचा मृत्यू झाला. याबाबतचा पुढील तपास पोलिस उपनिरीक्षक चेतन भोसले करत आहेत.

रस्ते अपघातात सहा जणांचा मृत्यू

आठवडाभरात शहरात वेगवेगळ्या भागांमध्ये अपघातात सहा जणांचा मृत्यू झाला आहे. कोंढवा भागात भरधाव मोटारीच्या धडकेत निवृत्ती बाजीराव किसवे (वय १३, रा. कोंढवा) याचा रविवारी (१८ मे) सायंकाळी मृत्यू झाला होता. शनिवारी (१७ मे) दुपारी डंपरच्या चाकाखाली सापडून दुचाकीवरील सहप्रवासी शाळकरी मुलाचा मृत्यू झाल्याची घटना खराडी भागात घडली आहे. अपघातात अंशुमन अनुपमकुमार गायकवाड (वय ११, रा. केशवननगर, मुंढवा) याचा मृत्यू झाला. त्यानंतर सोमवारी (१९ मे) रात्री कोथरूडमध्ये भरधाव मोटारीने दुचाकीला धडक दिल्याने झालेल्या अपघातात सहप्रवासी अबीर पानसे या बारा वर्षीय शाळकरी मुलाचा मृत्यू झाला होता. नगर रस्ता आणि येरवडा भागात दोन दिवसांपूर्वी वेगवेगळ्या अपघातांत पादचारी दोन ज्येष्ठ नागरिकांचा मृत्यू झाला होता.